Հայաստանն օգտվելու է բոլոր այն իրավունքներից, որից օգտվում են Եվրասիական տնտեսական միության հիմնադիր երկրները՝ առանց որեւէ բացառության: Այս մասին NEWS.am-ի թղթակցի հետ զրույցում հայտարարեց Ազգային Ժողովի ՀՀԿ խմբակցության պատգամավոր, արտաքին հարաբերությունների մշտական հանձնաժողովի նախագահ Արտակ Զաքարյանը:
Նրա խոսքով, Հայաստանը ԵՏՄ հիմնադիր-պետություն չի համարվում, քանի որ այդ կազմակերպությունը հիմնադրվել է երեք պետությունների ղեկավարների (Ռուսաստան, Բելառուս եւ Ղազախստան - խմբ.) ստորագրած պայմանագրով: «Իսկ մենք միանում ենք հիմնադիր պայմանագրին: Այդ պայմանագիրը, ըստ էության, բաց է, բայց յուրաքանչյուր երկրի համար մոտեցումներ եւ մոդելներ կան: Հայաստանի համար մոտեցումներն առանձնահատկություններ ունեն»,- ընդգծեց Արտակ Զաքարյանը:
Անդրադառնալով ԵՏՄ-ին Ադրբեջանի միանալու հավանականության մասին խոսակցություններին՝ պատգամավորը նշեց. «Եվրասիական տնտեսական միությանն Ադրբեջանի անդամակցության հարցը ներկայում ոչ մի կերպ չի դիտարկվում, սակայն դա բացառել չի կարելի»:
Հիշեցնենք, որ Հայաստանը ԵՏՄ-ին անդամակցելու մասին պայմանագիրը ստորագրեց այս տարվա հոկտեմբերի 10-ին, Մինսկում կայացած Եվրասիական տնտեսական խորհրդի նիստի ժամանակ: ԵՏՄ-ն հիմնադրվել է 2014 թվականի մայիսի 29-ին, Աստանայում, Ռուսաստանի, Բելառուսի եւ Ղազախստանի ղեկավարների կողմից:
