Ամեն անգամ Ադրբեջանի եւ Հայաստանի նախագահների բարձր մակարդակով հանդիպման նախօրեին խորհրդարանի նիստերի դահլիճում սկսվում է ադրբեջանական նավթադոլարներով բուրել: Այդ մասին այսօր՝ հոկտեմբերի 21-ին, հայտարարեց իշխող Հանրապետական խմբակցության ղեկավար Վահրամ Բաղդասարյանը:
Նրա խոսքով՝ իր համար ակնհայտ է, որ Արեւմուտքը բավականին մեծ գումարներ է ներդնում Հայաստանում, եւ շատերն են պատվերներ կատարում: «Երեկ մենք պետական դավաճանության դասական օրինակի ականատեսը եղանք: Հայաստանի խորհրդարանի հարթակը օգտագործվեց Ադրբեջանի եւ Թուրքիայի սուտ տեղեկություններ տրամադրելու համար: Այստեղ սուտ տեղեկություններ հնչեցվեցին: Հետեւեք նման ելույթների շարժընթացին, դրանք արվում են Հայաստանի եւ Ադրբեջանի նախագահների հանդիպման նախօրեին: Սակայն երեկ այս սրահում ես ալիեւյան նավթադոլարների բույրը զգացի, կարծես թե փոխվել է ֆինանսավորման աղբյուրը, եւ փողերն այնտեղից էին հոսել»:
Խորհրդարանական խմբակցության ղեկավարի խոսքն ընդհատեցին ընդդիմադիր պատգամավորներ Նիկոլ Փաշինյանն ու Զարուհի Փոստանջյանը: ԱԺ նախագահ Գալուստ Սահակյանը ստիպված եղավ միջամտել:
Միջադեպից հետո Վահրամ Բաղդասարյանը շարունակեց իր ելույթը: «Ես շատ ուրախ եմ, որ որոշ մարդիկ իրենց վրա վերցրին իմ խոսքերը: Ես անուններ չտվեցի, պարզապես իմ մտահոգությունը հայտնեցի: Մեր մեծերը խելացի խորհուրդ են մեզ տվել՝ չվիճել հիմարների, պոռոտախոսների հետ, քանի որ նրանք իրենց փորձով կխեղդեն նորմալ մարդուն: Ուստի ես չեմ ցանկանում իջնել այդ մակարդակին, իսկ նման կատեգորիայի մեջ մտնող մարդկանց խորհուրդ եմ տալիս իրենց այս հարցը տալ՝ ի՞նչ են նրանք արել իրենց հայրենիքի, ժողովրդի, պետության կայանալու համար»: Բաղդասարյանն իր ելույթը եզրափակեց ընդդիմադիր պատգամավորներին ուղղված կոչով. «Որքան էլ մեծ լինի արտասահմանից ֆինանսավորումը, մի օգտագործեք այս տրիբունան տարբեր «Կոնչիտաներին» գովերգելու համար, մենք ավանդույթները հարգող ազգ ենք»: