Ռուսաստանի աշխատանքային հայ միգրանտների եկամտահարկը կարող է փոխանցվել Հայաստանին: Այս մասին հոկտեմբերի 21-ին խորհրդարանում հայտարարել է ընդդիմադիր պատգամավոր, նախկին վարչապետ Հրանտ Բագրատյանը:
«Ինչպես հայտնի է, Ռուսաստանում ֆիզիկական անձանց եկամտահարկի մի մասն ուղղվում է դաշնային բյուջե, մյուսը մնում է տեղական բյուջեներում: Ես բազմիցս ասել եմ, որ մենք վաղուց պետք է այնպես անեինք, որպեսզի համայնքները, վերջապես, իրական բյուջե ունենան, այլ ոչ թե ամեն անգամ խնդրեն Երեւանից», - ասել է Բագրատյանը: Նա հավելել է, որ այդ դեպքում, անհրաժեշտ է մտածել Ռուսաստանի եւ ԵՏՄ այլ երկրների հետ համաձայնագրերի մասին, ընդ որում՝ դրանից կշահեն նաեւ Միության մյուս պետությունները. Հայաստանում աշխատող ռուսաստանցիների կամ ղազախստանցիների եկամտահարկի մի մասը կփոխանցվի այդ երկրների համայնքների բյուջե:
Իր հերթին ֆինանսների փոխնախարար Վախթանգ Միրումյանը նշել է, որ համաշխարհային փորձում նման համաձայնագրեր չկան: «Այդ պատճառով էլ ռուսական կողմի հետ մենք նման հարցեր չենք քննարկել», - ընդգծել է նա: