Ավստրալիայում մարդու իրավունքներով զբաղվող առաջատար փաստաբաններից մեկը՝ Ջեֆրի Ռոբերթսոնը, ով նաեւ ՄԱԿ-ում աշխատում է որպես դատավոր ռազմական հանցագործությունների գործերով, գիրք է գրել Հայոց ցեղասպանության մասին: Գրքի շնորհանդեսը տեղի կունենա Կանբերայի ազգային մամուլի ակումբում: Այս մասին գրում է «Asbarez»-ը՝ վկայակոչելով Ավստրալիայի Հայ դատի հանձնախումբը:
«Անհարմար ցեղասպանություն. Ով է հիմա հիշում հայերին» գրքում հեղինակը համոզիչ փաստարկներ է ներկայացնում, որոնք հիմնված են փաստերի, ապացույցների, ինչպես նաեւ միջազգային իրավունքում իր գիտելիքների ու փորձի վրա՝ ապացուցելով, որ առանց որեւէ կասկածի, 1915-ին տեղի ունեցած սարսափելի իրադարձությունները ցեղասպանություն են:
