Հայաստանի ներքաղաքական ընդդիմադիր դաշտում վիճակն այնպիսին է, որ չի բացառվում, որ խորհրդարանական եռյակում (ԲՀԿ, ՀԱԿ, «Ժառանգություն») մնան երկու կուսակցություններ: Այս մասին NEWS.am-ի թղթակցի հետ զրույցում նշել է քաղաքագետ Սերգեյ Մինասյանը:
«Մենք բախվում ենք մի իրավիճակի, երբ ներքաղաքական դաշտում տեղի կունենան անորոշ գործընթացներ»,-ասել է քաղաքագետը: Այդուհանդերձ, նա ոչ մի լուրջ գործընթաց չի կանխատեսում, նշելով, որ խնդիրը ոչ միայն երեք ուժերի ներուժի մեջ է, այլեւ արտաքին քաղաքական հարցերում նրանց դիրքորոշումների:
Մինասյանը չի բացառում, որ «Ժառանգությունը» դուրս գա եռյակից, կամ ավելի արմատական դիրքորոշում որդեգրի: Նրա կարծիքով, լավագույն դեպքում կարելի կլինի խոսել այն մասին, որ ԲՀԿ-ն եւ ՀԱԿ-ը կշարունակեն համագործակցությունը, իսկ վատագույն դեպքում կլինի քաղաքական ուժերի նոր դասավորություն:
Հարցին, թե հնարավո՞ր է, որ եռյակի պառակտման պատճառ դառնա նախագահի միասնական թեկնածու ունենալու ցանկության բացակայությունը, քանի որ այդ ուժերից յուրաքանչյուրն ունի իր թեկնածուն, Մինասյանը նշել է, որ անձերի մասին խոսելը դեռ վաղ է: «Եռյակի մաս կազմող ուժերի պառակտումը ոչ միայն գաղափարական է, այլեւ կառուցվածքային: «Ժառանգությունում» կառավարման բավական յուրահատուկ ձեւ է գործում, իսկ ԲՀԿ-ում լրիվ այլ իշխանության ուղղահայաց է»,-ընդգծել է Մինասյանը:
Միաժամանակ, քաղաքագետը տվյալ պահին բացառել է իշխող ՀՀԿ-ի եւ ԲՀԿ-ի միջեւ կոալիցիայի ձեւավորման հնարավորությունը, քանի որ ցանկության դեպքում «ԲՀԿ» կաներ դա առավել շահավետ պայմանների դեպքում՝ 2012թ.-ի խորհրդարանական ընտրությունների արդյունքների հիման վրա. «Այն, ինչ կարող են նրանց այժմ առաջարկել, պակաս շահավետ է, քան կարող էին այն ժամանակ առաջարկել: «Բարգավաճ Հայաստանն» այժմ պատրաստվելու է խորհրդարանական ընտրություններին, այլ ոչ թե նախագահական»:
Հիշեցնենք, որ «Ժառանգություն» կուսակցության խորհրդարանական խմբակցության ղեկավար Ռուբեն Հակոբյանը հայտարարել էր, Հայաստանի խորհրդարանական ուժերի եռյակը («Բարգավաճ Հայաստան», «Հայ ազգային կոնգրես» եւ «Ժառանգություն») չեն քննարկում նախագահի միասնական թեկնածուի հարցը. «Սա չի նշանակում, որ ուժերից յուրաքանչյուրը կարող է առաջիկա նախագահական ընտրություններում իր թեկնածուին առաջադրել: Բնականաբար, մենք նույնպես մեր թեկնածուն ունենք: Հարցն այժմ չենք քննարկում, իսկ տվյալ թեմայի վերաբերյալ հայտարարություններ անում են նրանք, ովքեր ցանկանում են ինչ-որ ինտրիգ հաղորդել մեր համագործակցությանը»:
