Հայ-իրանական բազմաթիվ երկկողմ նախագծեր հետաձգվում են, կամ չեն իրագործվում այն պատճառով, որ երկու երկրների հարաբերությունները միայն նրանցից կախված չեն: Այդ մասին այսօր՝ հոկտեմբերի 22-ին, հայտարարեց քաղաքագետ Շուշան Խաթլամաջյանը:
Ինչ վերաբերում է Հայաստանի եւ Իրանի միջեւ ազատ առեւտրի գոտու ստեղծմանը եւ դրանից հնարավոր տնտեսական օգուտին, Խաթլամաջյանը կարծիք հայտնեց, որ օգուտները առավել շոշափելի կլինեն երկաթուղու գործարկման դեպքում: «Ինչ էլ պատահի, հայ-իրանական հարաբերությունները փայլուն են եւ զարգացման դրական միտում ունեն», - ընդգծեց Շուշան Խաթլամաջյանը:
Մամուլի ասուլիսի մեկ այլ մասնակից, իրանագետ Վարդան Ոսկանյանը, անդրադառնալով իրանա-ադրբեջանական հարաբերություններին, նշեց, որ Իրանին բացարձակապես շահավետ չէ Ադրբեջանի ուժեղացումը: «Եւ չնայած երկու երկրների հարաբերություններում առկա արտաքին փայլին, Իրանն ու Ադրբեջանը երբեք չեն կարող լիարժեք բարիդրացիական հարաբերություններ ունենալ», - նկատեց նա:
