Խորհրդարանական եռյակի հոկտեմբերի 24-ին նախատեսված հանրահավաքը ցույց կտա՝ կա՞ հայաստանում իրական ընդդիմություն, թե ոչ: Այս մասին NEWS.am-ի թղթակցի հետ զրույցում նշել է քաղտեխնոլոգ Կարեն Քոչարյանը՝ հավելելով, որ ներքաղաքական իրավիճակը Հայաստանում իներտ-ակտիվ է:
Հարցին, թե հնարավո՞ր է սկզբունքային տարաձայնությունների խորացում եռյակի ներսում՝ կապված ԵՏՄ-ին Հայաստանի անդամակցության հետ, եւ կարո՞ղ է դա հանգեցնել եռյակից «Ժառանգության» դուրս գալուն, Քոչարյանը պատասխանել է, որ ամենայն հավանականությամբ, այս պահին դա տարաձայնությունների միակ պատճառն է, սակայն այդ հարցի հետ կապված նախորդ հանրահավաքում Լեւոն Տեր-Պետրոսյանը հայտարարեց, որ 20-30 մարդկանց ջղաձգությունները չեն կարող քաղաքական օրակարգ թելադրել:
«Ընդ որում, այդ մասին Տեր-Պետրոսյանն ասաց ԵՏՄ-ի դեմ «Ժառանգություն» կուսակցության առաջնորդ Րաֆֆի Հովհաննիսյանի ելույթից 15-20 րոպե անց»,-նկատել է քաղտեխնոլոգը:
Նրա խոսքով՝, ակնհայտ , որ «Ժառանգությունը» լինելով եռյակի կամ քառյակի անդամ, ոչինչ չի որոշում: «Ներկայումս կա մեկ ծանրակշիռ քաղաքական ուժ՝ ի դեմս ԲՀԿ-ի եւ մեկ ծանրակշիռ գործիչ՝ Լեւոն Տեր-Պետրոսյանը: Եթե ԲՀԿ-ն ցանկանա այս կամ այն քայլն անել, դրանք կձեռնարկվեն,չցանկանա՝ ամեն ինչ կմնա այնպես, ինչպես կա: Այսինքն, եթե ԲՀԿ-ն ցանկանա իրավիճակը մի փոքր լարել, կանի այդ քայլերը: Եթե ԲՀԿ-ն ու Լեւոն Տեր-Պետրոսյանը կողմեն հանդես գալիս Հայաստանի՝ ԵՏՄ-ին անդամակցությանը, ապա արդեն կարեւոր չէ, թե ինչ դիրքորոշում ունեն եռյակի մյուս քաղաքական ուժերը, կամ նրանք, որոնք հետո են միանալու»,-ընդգծել է Կարեն Քոչարյանը:
