Իրան եւ ԱՄՆ կատարած այցերն արդյունավետ էին: Այդ մասին այսօր՝ հոկտեմբերի 22-ին, խորհրդարանում հայտարարեց վարչապետ Հովիկ Աբրահամյանը՝ պատասխանելով ԵՏՄ-ին երկրի ինտեգրման ֆոնին վարչապետի այցի արդյունքների վերաբերյալ ընդդիմադիր Խաչատուր Քոքոբելյանի հարցին:
Արժույթի միջազգային հիմնադրամի եւ Համաշխարհային բանկի ամենամյա ժողովի շրջանակներում Հայաստանի պատվիրակությունը այցելել է Վաշինգթոն. հանդիպումներ են կայացել այդ կառույցների ղեկավարների հետ, որոնց ընթացքում քննարկվել են 2014-2017թթ. համագործակցության հետագա ծրագրերը: «Մենք նաեւ քննարկեցինք այն հանգամանքը, որ Ռուսաստանի նկատմամբ կիրառվող պատամիջոցները կազդեն Հայաստանի տնտեսության վրա: Այդ կառույցների ներկայացուցիչները տվյալ համատեքստում համաձայնեցին վերանայել 2014-2017թթ. ծրագրի ֆինանսավորման փաթեթը», - հայտարարեց Աբրահամյանը:
Անդրադառնալով հայկական պատվիրակության Իրան կատարած այցին՝ Աբրահամյանը նշեց, որ այն արդյունավետ էր. «Պատվիրակությանն ընդունեցին երկրի նախագահն ու փոխնախագահը, ինչպես նաեւ բանակցություններ ընթացան կառավարության անդամների հետ: Այցի արդյունքներով՝ վերջին երկու տարիների ընթացքում կիսասառեցված վիճակում գտնվող երկկողմ ծրագրերը կվերականգնվեն: Համոզված եմ, որ ձեքբերված բոլոր պայմանավորվածությունները մոտ ապագայում կիրագործվեն»:
