Moody's գործակալությունը չի բացառում Ռուսաստանի դեմ նոր պատժամիջոցների կիրառումը կամ արդեն գործողների խստացումը: Այս մասին հայտնում է ՏԱՍՍ-ը՝ մեջբերելով գործակալության վերլուծաբան Թորսթեն Նեսթմանի խոսքերը:
«Վարկանիշի կանխատեսումը բացասական է, քանի որ Ուկրաինայի իրավիճակն առայսօր անկայուն է, եւ չի կարելի բացառել, որ ռիսկերը կմեծանան եւ նոր պատժամիջոցներ կկիրառվեն կամ էլ գործողները կընդլայնվեն», - Նեսթմանի խոսքերն է մեջբերում աղբյուրը:
Նավթի գների աճը, կարծում է վերլուծաբանը, կարող է վարկանիշի բարձրացման հանգեցնել, քանի որ գնանկումը Ռուսաստանի տնտեսության վատթարացման էր հանգեցրել: Նշենք, Moody's-ը հոկտեմբերի 22-ին Մոսկվայի եւ Սանկտ Պետերբուրգի վարկանիշն Baa1-ից իջեցրել էր Baa2-ի:
Հոկտեմբերի 21-ին գործակալությունն իջեցրել էր նաեւ Ռուսաստանի յոթ խոշորագույն ֆինանսական կառույցների՝ «Սբերբանկի», «Գազպրոմբանկի», «Ռոսսելխոզբանկի», «ՎՏԲ բանկի», «Վնեշէկոնոմբանկի», «Ալֆա բանկի» եւ Հիփոթեքային բնակարանային վարկավորման գործակալության վարկանիշները: