Ժողովրդավարական պետություն լինելու լավ նախադրյալներ ստեղծում է հենց կառավարման խորհրդարանական համակարգը: Այսօր` հոկտեմբերի 23-ին, լրագրողների հետ զրույցում այսպիսի կարծիք հայտնեց Ազգային ժողովի ՀՀԿ խմբակցության պատգամավոր Արտակ Դավթյանը` մեկնաբանելով Սահմանադրական բարեփոխումների մասին հայեցակարգը:
ՀՀԿ-ական պատգամավորի խոսքով` հայեցակարգում առկա են առավել կարեւոր կետեր, քան կառավարման մոդելի մասին հարցն է:
«Առավել հուզող շրջանակներից մեկը սոցիալական խնդիրներն են: Սահմանադրությամբ ամրագրված է, որ մենք սոցիալական պետություն ենք, սակայն ոչինչ ավելին նշված կամ երաշխավորված չէ: Բացի դրանից` իրավունքի գերակայությունն էլ հայեցակարգի հարցադրումներից մեկը, կամ մարդու իրավունքներն ու ազատությունները, որոնք մենք ամրագրել ենք, բայց չենք երաշխավորել: Հետեւաբար, կարծում եմ, որ կառավարման համակարգը կարեւոր հարց է, սակայն իմ նշած հարցերն էլ են կարեւոր»,- ասաց Արտակ Դավթյանը:
ՀՀԿ-ական պատգամավորի խոսքով` վերջնական տարբերակը պարզ կլինի միայն հաջորդ տարվա գարնանը, որից հետո էլ արդեն ժողովուրդն իր ընտրությունը կկատարի:
Նշենք, որ Սահմանադրական բարեփոխումների մասին հայեցակարգը նախագահին է հանձնվել հոկտեմբերի 15-ին: