Ուկրաինայի զորքերի եւ Ռուսաստանի կողմից աջակցություն ստացող ռուսամետ ապստամբների միջեւ կրակի դադարեցման համաձայնագիրը ամբողջությամբ չէ, որ պահպանվում է: Այսպիսով, եվրոպական պատժամիջոցները Ռուսաստանի նկատմամբ պետք է պահպանվեն: Այս մասին հաղորդում է Nasdaq-ը՝ մեջբերելով Գերմանիայի կանցլեր Անգելա Մերկելի խոսքը:
«Երբ ձեզ մոտ ավելի քան 200 մարդ է զոհվել, դուք չեք կարող խոսել կրակի դադարեցման մասին»,-ասել է Մերկելը ԵՄ գագաթաժողովից հետո:
Աղբյուրի փոխանցմամբ, Մերկելը հայտարարել է, որ ինքն անհանգստացած է Լուգանսկում եւ Դոնեցկում սպասվող ընտրությունների առթիվ, որոնք հակասում են Ուկրաինայի օրենսդրությանը:
Հիշեցնենք, որ նախորդ շաբաթ Միլանում տեղի է ունեցել Ռուսաստանի նախագահ Վլադիմիր Պուտինի, եվրոպական երկրների առաջնորդների եւ Ուկրաինայի նախագահ Պյոտր Պորոշենկոյի հանդիպումը: Հանդիպման մասնակիցները դրական են գնահատել այդ բանակցությունների արդյունքները, սակայն դրանք կոնկրետ համաձայնագրերի չեն հանգեցրել: