Դերասան Վարդան Պետրոսյանի գործով հերթական դատական նիստին, որը նշանակված էր այսօր՝ հոկտեմբերի 24-ին, հետաձգվեց. Կոտայքի մարզի ընդհանուր իրավասության դատարան չէին ներկայացել Վարդան Պետրոսյանի փաստաբանները:
Նիստի քարտուղարը հայտնեց, որ դերասանի փաստաբան Նիկոլայ Բաղդասարյանը դատարանին նախօրոք տեղեկացրել է, որ առողջական խնդիրներ ունի եւ չի կարող ներկայանալ դատարան: Դերասանի մյուս պաշտպանի՝ Սամվել Ջաղինյանի բացակայության պատճառը այդպես էլ հայտնի չդարձավ:
Դատական հաջորդ նիստը նշանակվեց հոկտեմբերի 31-ին:
Հիշեցնենք, որ ըստ մեղադրական եզրակացության՝ Վարդան Պետրոսյանը 2013թ. հոկտեմբերի 20-ին, ժամը 22:10–ի սահմաններում, Կոտայքի մարզի Սարալանջ գյուղի կողմից դեպի Երեւան ուղղությամբ վարելիս «ԲՄՎ-320» մակնիշի մեքենայով բախվել է կայանած «Վազ 21214» մակնիշի մեքենայի հետնամասին։ Վթարի հետեւանքով «Վազ-21214» մակնիշի մեքենայի ուղեւորներ էդվարդ եւ էդգար Հայկի Հակոբյանները մահացել են, ուղեւորներ Տաթեւիկ Հակոբյանը, Հայկ Հակոբյանը, էմմա Հակոբյանը, ինչպես նաեւ վարորդ Արթուր Հակոբյանն ստացել են վնասվածքներ: Վարդան Պետրոսյանին մեղադրանք է առաջադրվել ՀՀ քրեական օրենսգրքի 242-րդ հոդվածի 3-րդ մասի հատկանիշներով՝ «Ճանապարհային երթևեկության կամ տրանսպորտային միջոցների շահագործման կանոնները խախտելը, որն անզգուշությամբ առաջացրել է երկու կամ ավելի մարդու մահ»։ Տուժող կողմը փորձում է ապացուցել, որ Վարդան Պետրոսյանը վթարի պահին եղել է ալկոհոլի ազդեցության տակ եւ գերազանցել է թույլատրելի արագությունը։ Դերասանը հերքում է այդ վարկածը եւ իրեն հերթին փորձում է ապացուցել, որ տուժող կողմի մեքենան կայանած է եղել ոչ թե ճանապարհի կողնակին, այլ երթեւեկելի գոտում, ունեցել է անսարքություններ։