Կոտայքի մարզի Կոտայք գյուղում այսօր՝ հոկտեմբերի 25-ին, վաղ առավոտյան տեղի ունեցած հրդեհի պատճառն ամենայն հավանականությամբ գազի բալոնն է եղել: Այս մասին NEWS.am-ին ասաց համայնքի ղեկավար Սահակ Հարությունյանը:
«Մահացած տղան այդ անասնագոմում նախրապան էր աշխատում, մեր համագյուղացին չի եղել, չենք ճանաչում: Ինչքանով տեղյակ ենք, ցանկացել է գազը վառել, տրաքել է բալոնն ու հրդեհ բռնկվել»,- ասաց գյուղապետը՝ նշելով, որ անասնագոմն իրենց գյուղի ծայրամասին է գտնվում:
Նշենք, որ ըստ արտակարգ իրավիճակների նախարարության՝ հոկտեմբերի 25-ին ժամը 09:00-ին Կոտայք - Կապուտան ավտոճանապարհի 1-ին կմ-ում գտնվող հանդամասում փլուզվել է անասնագոմին (պատկանում է Լ. Մ.-ին, ծնվ. 1974 թ.) հարակից շինության երկաթբետոնե տանիքից (30 քմ) մոտ 18 քմ հատված, որի հետեւանքով ներսում գտնվող Է. Հ.-ն (ծնվ. 1986 թ.) տեղում մահացել է: Պարզվել է նաեւ, որ շինությանը հարակից այրվում է 50 հակ կուտակված անասնակեր: