Ես կողմ եմ իմ առաջնորդին հավատալուն. հազար հոգով որոշում ընդունել, նշանակում է ոչինչ չընդունել, պիտի հավատաս շարժման լիդերներին: Այս մասին, եռյակի հանրահավաքից հետո, NEWS.am-ի թղթակցի հետ զրույցում նշել է ԲՀԿ խմբակցության պատգամավոր Լյովա Խաչատրյանը՝ պատասխանելով դիտարկմանը, որ հանրահավաքում իր ելույթի ժամանակ Րաֆֆի Հովհաննիսյանը հայտարարեց, որ Ծառուկյանը իր արմատական ելույթի ժամանակ նստացույցի հարցը քվեարկության կդնի, սակայն նման քվերակություն տեղի չունեցավ:
Հարցին, թե ի՞նչն էր պատճառը նստացույց չանելու, ժողովրդի մեջ չնկատեցի՞ն վճռականություն, Խաչատրյանը պատասխանել է. «Ես կողմ եմ իմ առաջնորդին հավատալու: Հազար հոգով որոշում ընդունել, նշանակում է ոչինչ չընդունել, պիտի հավատաս շարժման լիդերներին: Ես իմ առաջնորդին հավատալու կողմ եմ, անվերապահորեն հավատն է լուծում ցանկացած խնդիր»:
Դիտարկմանը, թե նախադեպեր կան, որ հանրահավաքներին տանել-բերելով ու վճռական խոսք ու քայլ չանելով, ժողովրդին հիասթափեցրել են, շարժումը մարել է, արդյոք այս շարժմանը դա չի սպառնո՞ւմ, պատգամավորը պատասխանել է. «Կասկածում են թույլ մարդիկ, ուժեղ մարդիկ հավատում են առաջնորդներին»:
Լյովա Խաչատրյանը անդրադարձել է նաեւ Սերժ Սարգսյան-Գագիկ Ծառուկյան հնարավոր պայմանավորվածություններին, հանրահավաքից առաջ. «Ինձ ոչ-ոք նման ինֆորմացիա չի տվել, ես անվերապահորեն հավատում եմ իմ կուսակցության լիդերին»:
Անդրադառնալով ընդդիմադիրների մանդատները վայր դնելու հնարավորությանը՝ որպես բոյկոտ, Լյովա Խաչատրյանը վրդովվել է. «Բայց ինչու մենք դնենք մեր մանդատները, ինչն է խանգարում մանդատով պայքարելուն, թող իշխանությունը դնի իրանց մանդատները, ոնց կարելի է ժողովրդի տված քվեից հրաժարավել»:
Ինչ վերաբերում է հարթակում կանգնած լիդերների գաղափարական հակասություններին, որոնք արտահայտվում են հենց իրենց ելույթների ընթացքում, ԲՀԿ-ական պատգամավորն արձագանքելն է. «Դա ազատ խոսքի իրավունք է»:
