Հյուսիսային Իրաքի Քուրդիստանի զինված ուժերի՝ փեշմերգայի 150 հոգանոց զորաջոկատը հոկտեմբերի 28-ին մեկնելու է Թուրքիա, որտեղից կանցնեն Քոբանի։
Թուրքական Milliyet-ի փոխանցմամբ՝ քրդական փեշմերգայի 150 հոգանոց հատուկ նշանակության զորաջոկատը Էրբիլից օդային ճանապարհով կհասնի Թուրքիա, որտեղ նրանք կհանդերձավորվեն ցամաքային ճանապարհով բերված ծանր զինտեխնիկայով եւ կանցնեն Քոբանի՝ կռվելու «Իսլամական պետություն» ահաբեկչական խմբավորման դեմ։
Նշենք, որ իսլամիստները սեպտեմբերի 16-ից լայնածավալ հարձակում են ձեռնարկել Սիրիայի քրդաբնակ Քոբանիի դեմ։ Այդ ընթացքում Քոբանիից Թուրքիա է անցել մոտ 200 հազար փախստական, որից հետո Թուրքիան փակել է Քոբանիի հետ սահմանը։
Արեւմուտքի ճնշման տակ Թուրքիան ստիպված է եղել թույլ տալ Իրաքի Քուրդիստանի ինքնավար հատվածի զինված ուժերի զորաջոկատներին մեկնել Քոբանի Թուրքիայի տարածքով, քանի որ ցամաքային այլ ճանապարհ չկա Քոբանիի հասնելու համար։