Ընթացիկ նոյեմբերին Բրյուսելում կկայանա Հայաստան-Եվրամիություն հետագա համագործակցության հարցով խորհրդակցությունների առաջին մասը: Հետագայում դրանք կշարունակվեն: Այս մասին հոկտեմբերի 28-ին լրագրողներին հայտարարել է Հայաստանում Եվրամիության պատվիրակության ղեկավար, դեսպան Տրայան Հրիսթեան:
Անդրադառնալով այն հարցին, թե ինչպիսին կլինեն Հայաստան-ԵՄ հարաբերությունների նոր շրջանակները, դեսպանը նշել է. «Առաջին հերթին, ցանկանում եմ ընդգծել, որ խոսքը բանակցությունների մասին չէ: Մենք կցանկանայինք ուսումնասիրել երկկողմ հարաբերությունների այն բնագավառները, որոնք համահունչ կլինեն Հայաստանի նոր պարտավորություններին»: Ըստ նրա, քանի որ Հայաստանը ԵՏՄ-ին անդամակցելու պայմանագիր է ստորագրել , ԵՄ-ն կցանկանար իմանալ՝ որոնք են այն բնագավառները, որոնցում Հայաստանը ցանկանում է համագործակցել եւ որ ոլորտներում Եվրամիությունը կարող է օգնել հատվածական բարեփոխումներ անցկացնել: «Ինչպես կարող են այդ ոլորտները համընկնել այն մանդատի հետ, որի վերաբերյալ ապագայում մենք պետք է բանակցություններ վարենք: Մենք պետք է շարունակենք այն, ինչի շուրջ համաձայնության ենք եկել Վիլնյուսում», - ընդգծել է Հրիսթեան:
