Օրերս Ժնեւում տեղի է ունեցել ՄԱԿ-ի Խոշտանգումների, դաժան եւ անմարդկային կամ նվաստացնող վերաբերմունքի կամ պատժի կանխարգելման ենթակոմիտեի անդամների ընտրությունը, որտեղ «Քաղաքացիական հասարակության ինստիտուտ» ՀԿ (Հայաստան) նախագահ Արման Դանիելյանը վերընտրվել է որպես ենթակոմիտեի անդամ 4 տարի ժամկետով։ Նա ենթակոմիտեի անդամ է հանդիսանում 2011թ.–ից։
ՔՀԻ-ից հայտնում են, որ Խոշտանգումների կանխարգելման ենթակոմիտեն ՄԱԿ-ի կարեւորագույն մեխանիզմներից է, որի նպատակն է կանխել խոշտանգումները եւ այլ դաժան, անմարդկային կամ նվաստացնող վերաբերմունքը կամ պատիժը անդամ պետություններում, ազատազրկման մեջ գտնվող անձանց պահման վայրեր պարբերական այցելություններ կատարելու միջոցով: Այն իր աշխատանքը սկսել է 2007թ. փետրվարից։
Խոշտանգումների կանխարգելման ենթակոմիտեի անդամների թիվը 25–ն է, այն ՄԱԿ-ի ամենամեծ հանձնաժողովն է։
ՄԱԿ-ի Խոշտանգումների, դաժան եւ անմարդկային կամ նվաստացնող վերաբերմունքի կամ պատժի կանխարգելման դեմ կոնվենցիայի Կամընտիր արձանագրությանը միացել է 70-ից ավելի պետություն։
Հայաստանի Հանրապետությունը Կամընտիր արձանագրությունը վավերացրել է 2006թ.-ին, եւ Արման Դանիելյանն առաջին փորձագետն է Հայաստանից, ով ներկայացված է ենթակոմիտեում։