«Օրինաց երկիր» կուսակցության նախաձեռնությամբ Ազգային ժողովում Հայաստանի Ընտրական օրենսգրքում (100%-անոց համամասնական ընտարական համակարգին անցմանը) փոփոխություններ մտցնելու նպատակով աշխատանքային խումբ է ստեղծվել: Այդ մասին այսօր՝ հոկտեմբերի 31-ին, մամուլի ասուլիսի ժամանակ Ազգային ժողովում հայտարարեց «Օրինաց երկիր» խմբակցության պատգամավոր Հովհաննես Մարգարյանը:
Նրա խոսքով՝ «Ժառանգությունից» աշխատանքային խմբին կմասնակցի խմբակցության քարտուղար Թեւան Պողոսյանը, ՀՅԴ խմբակցությունից՝ Արծվիկ Մինասյնաը, ԲՀԿ-ից՝ Տիգրան Ուրիխանյանը, իսկ «Օրինաց երկիր» խմբակցությունից՝ ինքը՝ Հովհաննես Մարգարյանը: «Հայ ազգային կոնգրեսը հայտարարել է, որ չի մասնակցի աշխատանքային խմբի աշխատանքներին: Հանրապետական կուսակցությունը նույնպես հրաժարվել է մասնակցությունից», - նշեց Հովհաննես Մարգսրյանը:
Հայաստանի Ընտրական օրենսգրքում առաջ քաշված բարեփոխումների հիմքը 100%-անոց համամասնական ընտրական համակարգին անցումն է: «Աշխատանքային խումբն իր աշխատանքները կսկսի հաջորդ շաբաթվանից՝ երկուշաբթի օրվանից», - նշեց Հովհաննես Մարգարյանը:
