Նոյեմբերի 2-ին Ուկրաինայի Դոնեցկի եւ Լուգանսկի մարզերում նախանշված ընտրությունները խաթարում են այդ երկրում կոնֆլիկտի լուծմանն ուղղված ջանքերը: Այս մասին, ըստ ՆԱՏՕ-ի պաշտոնական կայքի, հայտարարել է դաշինքի գլխավոր քարտուղար Յենս Ստոլտենբերգը:
Նրա խոսքով, ընտրությունները խախտում են ուկրաինական օրենքներն ու հակասում Մինսկի համաձայնություններին:
ՆԱՏՕ-ի գլխավոր քարտուղարի հաղորդագրությունում նշվում է, որ ճանաչելով այդ ընտրությունները՝ Ռուսաստանը շարունակում է Ուկրաինայում իրավիճակն ապակայունացնելու իր ջանքերը: «ՆԱՏՕ-ի դաշնակիցները հստակ կերպով հասկացրել են, որ չեն ճանաչելու այսպես կոչված անջատողական ընտրությունները»,- ասված է հաղորդագրությունում:
Աղբյուրի համաձայն, ՆԱՏՕ-ն լիովին աջակցում է Ուկրաինայի ինքնիշխանությունն ու տարածքային ամբողջականությունը: Ստոլտենբերգը Ռուսաստանին կոչ է արել հարգել Մինսկի համաձայնի շրջանակում ստանձնած պարտավորությունները, որոնք կարող էին օգնել խաղաղ կարգավորման ուղի հարթել: