Հայաստանի Հանրապետական կուսակցությունն այսօր չի քննարկել հանրապետության փոխվարչապետի թեկնածուի հարցը: ՀՀԿ Գործադիր մարմնի՝ հոկտեմբերի 31-ին կայացած նիստից հետո այս մասին լրագրողներին հայտարարեց խորհրդարանի փոխխոսնակ, ՀՀԿ մամուլի քարտուղար Էդուարդ Շարմազանովը: «Փոխվարչապետի հարցը չի քննարկվել»,- ընդգծեց Շարմազանովը:
Նախկին փոխվարչապետ Արմեն Գեւորգյանը պետական ապարատում աշխատել է 1997-2014 թվականներին: Տարբեր տարիների նա զբաղեցրել է վարչապետի օգնականի, նախագահի օգնականի եւ առաջին օգնականի, նախագահի աշխատակազմի ղեկավարի, Ազգային անվտանգության խորհրդի քարտուղարի, Հայաստանի տարածքային կառավարման նախարարի եւ փոխվարչապետի պաշտոնները:
Հոկտեմբերի 30-ին Գեւորգյանը զբաղեցրեց IDeA («Հայաստանի զարգացման նախաձեռնություններ») հիմնադրամի տնօրենի պաշտոնը, որը հիմնել են բարերար եւ գործարար Ռուբեն Վարդանյանն ու նրա տիկինը՝ Վերանիկա Զոնաբենդը:
