ԵԿՄ վարչության նախագահ, գեներալ-լեյտենանտ Մանվել Գրիգորյանը դեմ է ադրբեջանցի դիվերսանտներիին դատելուն, ըստ նրա՝ դիվերսանտներին պետք է գնդակահարեին: Այս մասին այսօր՝ նոյեմբերի 1-ին, Երկրապահ կամավորականների միությունում լրագրողների հետ զրույցում ասաց Մանվել Գրգորյանը:
«Մի քանի անգամ ասել եմ, հիմա էլ ասում եմ, որ դիվերսանտներին պետք է գնդակահարել, որ դատ չլինի: Ըտենց մարդիկ անչափահաս երեխեք են սպանում, սահման են խախտում, ի՞նչ դատ-դատաստան: Աստված պիտի դատաստան լինի, նրանց պիտի գնդակահարեին, չբռնեին»,-ասաց Մանվել Գրիգորյանը: Լրագրողներից մեկի դիտարկմանը, որ այդ դեպքում միջազգային կառույցները կքննադատեին, ԵԿՄ նախագահն արձագանքեց. «Երեխա սպանելուց միջազգային կառույցները խի՞ չեն բան անում բա»:
Հիշեցնենք, որ դատավարությունն անցնում է ԼՂՀ մայրաքաղաք Ստեփանակերտի առաջին ատյանի ընդհանուր իրավասության դատարանում:
Դիլհամ Ասկերովին մեղադրանք է առաջադրվել Լեռնային Ղարաբաղի քրեական օրենսգրքի 7, իսկ նույն երկրի քաղաքացի Շահբազ Գուլիևին ՝ 5 հոդվածների հատկանիշներով։ Նրանք մեղադրվում են ազգային ատելության շարժառիթներով մարդուն առևանգելով սպանելու, կազմակերպված խմբի կողմից անչափահասի նկատմամբ զենքի գործադրմամբ բռնություն գործադրելու, լրտեսության, Ղարաբաղի պետական սահմանը կազմակերպված խմբի կողմից հատելու, հրազեն և ռազմամթերք կրելու մեջ։ Դիլհամ Ասկերովին նաև կազմակերպված խմբի կողմից ազգային ատելության շարժառիթով երկու անձանց սպանության փորձի մեղադրանք է առաջադրվել։
Լուսանկարը՝ Արսեն Սարգսյանի/NEWS.am