Ստամբուլի հայկական «Ակոս» շաբաթաթերթի նախկին խմբագիր Հրանտ Դինքի սպանության գործի շրջանակներում որպես կասկածյալ հարցաքննության են կանչվել նախկին 9 պաշտոնյաներ։

Թուրքական Sozcu պարբերականի փոխանցմամբ՝ Թուրքիայի արդարադատության նախարարի թույլտվությունից հետո Ստամբուլի դատախազներից Յուսուֆ Հաքքը Դողանը  Դինքի սպանության գործում որպես կասկածյալ հարցաքննության է հրավիրել Ստամբուլի նախկին ոստիկանապետ Ջելալեթին Ջերրահին, Ստամբուլի ոստիկանության հետախուզության վարչության նախկին պետ Ահմեդ Իլհան Գյուլերին, Ստամբուլի նախկին փոխնահանգապետ Էրգյուն Գյունգորին եւ եւս 6 ոստիկանների։

Դինքի ընտանիքի փաստաբաններից Հաքան Բաքըրջըօղլուն նշել է, թե թեկուզ ուշ, սակայն պաշտոնյաներին հարցաքննելու թույլտվությունը կարեւոր զարգացում է։

Նշենք, որ օրեր առաջ Թուրքիայի արդարադատության նախարարությունը հավանություն է տվել՝ դատական գործեր հարուցել Դինքի սպանության ժամանակ կարեւոր պաշտոններ զբաղեցնող 9 չինովնիկի նկատմամբ, որոնց թվում են Ստամբուլի նահանգային նախկին ոստիկանապետ Ջելալեթին Ջերրահը, հետախուզության վարչության նախկին պետ Ահմեդ Իլհան Գյուլերը, Ստամբուլի նահանգապետի նախկին տեղակալ Էրգյուն Գյունգյորը եւ այլք։