Հայաստանի տնտեսությունում ներդրումները շարունակում են նվազել: Այս մասին նոյեմբերի 13-ին խորհրդարանում հայտարարել է ՀԱԿ խմբակցության ղեկավար Լեւոն Զուրաբյանը: Նրա խոսքով, խմբակցությունը դեմ է քվեարկելու 2015 թվականի պետբյուջեի նախագծին:
Դրանում առաջարկվում է ծախսերն ավելացնել 52 մլրդ դրամով (շուրջ 126.4 մլն դոլար - խմբ.) կամ 4.2%-ով՝ 2014-ի նախագծի համեմատ: 41 միլիարդն ուղղվելու է աշխատավարձերի բարձրացմանը, 6 միլիարդը՝ էներգակիրների թանկացմանը եւ միայն 5 միլիարդը կուղղվի կապիտալ ներդրումներին:
Պետական ներդրումների հետ միասին նվազում են նաեւ մասնավորները: Եթե 2011 թվականին կապիտալ ներդրումները կազմել են ՀՆԱ-ի 27.3%-ը, ապա 2013-ին դրանք նվազել են մինչեւ 20.5%:
Հարեւան Ադրբեջանի եւ Վրաստանի հետ համեմատելու դեպքում պատկերը հակառակն է: Զուրաբյանի խոսքով, վերջին տարիներին «ներդրումներ-ՀՆԱ» հարաբերակցությունը Վրաստանում 22-ից հասել է 25%-ի, Ադրբեջանում՝ 18-ից 25%-ի: «Հայաստանն ազատ անկման իրավիճակում է. 2014 թվականի առաջին կիսամյակում ներդրումները նվազել են 1.8%»,- հայտարարել է Լեւոն Զուրաբյանը: