Արցախյան ուղղաթիռի հետ կապված միջադեպում Ռուսաստանը, ամենայն հավանականությամբ, կփորձի սատարել Հայաստանին: Այս մասին գրում է իտալական Direttanews.it կայքը:
«Հետխորհրդային տարածաշրջանն ավելի ու ավելի է նմանվում եվրոպական ռազմական թատրոնի: Խոսքը միայն Ուկրաինայի մասին չէ (որտեղ արեւելքում արդեն ռուսական տանկեր են հայտնվել), այլեւ Կովկասի, որը կրկին սպառնում է իրադարձությունների էպիկենտրոն դառնալ: Նախօրեին Ադրբեջանի Զինված ուժերը հայկական ուղղաթիռ են կործանել Արցախի տարածքում: Հիմնականում հայ բնակչությամբ այս տարածքն ավտորիտար որոշմամբ խորհրդային ժամանակաշրջանում միացվեց Ադրբեջանին: 1988-94 թ.թ. այդ շրջանում կործանարար եւ արյունալի պատերազմ էր, որն ավելի քան 30 հազար մարդու կյանք խլեց: Հակամարտությանը, թվում է, անկարող են օգնել հանձնաժողովները, համաժողովներն ու միջազգային միջնորդները: Պատերազմւ գրեթե սառեցված էր թվում… Սակայն վերջին ամիսներին բախումները սկսել են հաճախակիանալ, հնարավոր է՝ ուկրաինական պատերազմի ազդեցությամբ»,- գրում է Direttanews-ը:
Երեք օդաչուով կործանված ուղղաթիռը կարող է հակամարտության ակտիվացման պատճառ դառնալ: Բաքվից պաշտպանության նախարարությունը հասկացրեց, որ ուղղաթիռը կանխամտածված է խփվել, քանի որ փորձել է զորքեր իջեցնել սահմանի մոտ: Իր հերթին, Հայաստանի պաշտպանական գերատեսչությունն այդ հայտարարությունն անհեթեթ է կոչում եւ հայտարարում է, որ իրականում ուղղաթիռը մասնակցում էր ուսումնավարժանքների: «Բաքվի համար հետեւանքները շատ ծանր են լինելու»,- հայտարարել է Հայաստանի ՊՆ մամուլի քարտուղար Արծրուն Հովհաննիսյանը:
«Ռուսաստանը, որը տասնամյակներով միջնորդ է հակամարտության մեջ, հնարավոր է՝ կփորձի սատարել Հայաստանի կառավարությանը»,- հավելում է հրատարակությունը:
Հիշեցնենք, որ ԼՂՀ ՊՆ-ի փոխանցմամբ, նոյեմբերի 12-ին ղարաբաղա-ադրբեջանական սահմանի արեւելյան հատվածի օդային տարածքում ժամը 13:45-ի սահմաններում ուսումնավարժական թռիչքի ժամանակ ադրբեջանական ԶՈւ-ի կողմից հրադադարի ռեժիմի խախտման արդյունքում խոցվել է ԼՂՀ ՌՕՈւ «Մի-24» ուղղաթիռը: Կործանման վայրը շփման գծին չափազանց մոտ է:
