Ոստիկանությունը աշխատում է կասկածյալներին ծեծի ենթարկելու միջոցով ցուցմունք կորզելու հնարավորությունը բացառելու ուղղությամբ: Այս մասին խորհրդարանում նոյեմբերի 18-ի լսումների ժամանակ հայտարարել է ՀՀ փոխոստիկանապետ Վարդան Եղիազարյանը:
Ըստ նրա՝ ընթացիկ տարվա 10 ամիսներին Ոստիկանության աշխատակիցների կողմից լիազորություններն անցնելու 1571 դեպք է գրանցվել, որոնցից 845-ի դեպքում տուգանվել են, 61 ոստիկան հեռացվել է աշխատանքից, 10 –ը՝ դատապարտվել: Ոստիկանությունը նաեւ համագործակցում է ՀԿ-ների ու միջազգային կառույցների, մասնավորապես՝ ԵԱՀԿ երեւանյան գրասենյակի հետ: Նա նաեւ նշել է, որ տարեցտարի ամրանում է հանրության եւ Ոստիկանության կապը. «Այս մասին են վկայում քաղաքացիների զանգերը, ամենշաբաթյա մամուլի ասուլիսները»:
Եղիազարյանը նաեւ վստահեցրել է, որ Ոստիկանության աշխատանքը թափանցիկ է: Այս համատեքստում պաշտոնյան նշել է Ոստիկանության կայքի ակտիվ աշխատանքը, նաեւ այն հանգամանքը, որ տեղեկատվության ազատության պլանում այն արժանացել է «Ոսկե բանալի» մրցանակի: