Ֆիննական Nokia ընկերությունը ցուցադրել է իր առաջին Android N1 պլանշետը, հայտնում է Lenta.ru-ն՝ վկայակոչելով ընկերության հաղորդագրությանը:
N1 պլանշետը կթողարկվի իր ֆիրմային գրաֆիկական պարույրով, 2015թ. առաջին եռամսյակից այն կվաճառվի Չինաստանում՝ 229 դոլարով: Պլանշետը կաշխատի Google Android ՕՀ-ով:
Nokia Technologies ստորաբաժանման ղեկավար Սեբաստիան Նիստրոմը հայտարարել է, որ ապագայում ծրագրում է ավելացնել սարքերի թվաքանակը: Ավելի վաղ, գործադիր տնօրեն Ռաջիվ Սուրին հայտնել էր, որ ընկերությունը քննարկում է բրենդը սպառողական էլեկտրոնիկայի շուկա վերադարձնելու հնարավորությունը՝ իր լոգոտիպի օգտագործման լիզենզիան տրամադրելով այլ արտադրողներին:
Nokia-ն իր բջջային ստորաբաժանումը 5,6 մլրդ եվրոյով վաճառել է Microsoft ընկերությանը: