Բոլոր հակամարտությունները պետք է լուծվեն խաղաղ ճանապարհով, NEWS.am-ի թղթակցի հետ զրույցում ասաց Հայաստանում Լատվիայի դեսպան (նստավայրը՝ Թբիլիսիում) Էլիտա Գավելեն՝ մեկնաբանելով շփման գծի միջադեպը, երբ ադրբեջանական ԶՈՒ-ն խոցել էր ուսումնավարժական թռիչք իրականացնող ԼՂՀ ԶՈՒ ուղղաթիռը:
«Ղարաբաղյան հակամարտության կարգավորմամբ զբաղվում է ԵԱՀԿ ՄԽ-ն: Ես զուգահեռներ կանցկացնեմ. Ռուսաստանի եւ Վրաստանի պարագայում կա բանակցությունների ժնեւյան ձեւաչափը: Մեր օրերում միանգամայն անընդունելի է հակամարտությունները զինված բախումներով կարգավորելը», - նշել է Գավելեն:
Ի պատասխան ճշտող հարցին, թե ինչպես է վերաբերվում փաստին, որ ադրբեջանական ԶՈՒ-ն խոցել է ուղղաթիռը, դեսպանն ասել է. «Անընդունելի է երկրների միջեւ հակամարտությունները զինված ճանապարհով կարգավորելը: Միայն խաղաղ բանակցությունների միջոցով կարելի է հասնել հարցի կարգավորմանը: Սա բազմամյա տքնաջան աշխատանք է, սակայն միայն միջազգային կազմակերպությունների մասնակցությամբ խաղաղ բանակցությունները կարող են դրական արդյունքի հանգեցնել»:
Հիշեցնենք, նոյեմբերի 12-ին ժ. 13:45-ի մոտակայքում սահմանի արեւելյան ուղղությամբ ադրբեջանական ԶՈՒ-ն խոցել էր ԼՂՀ ԶՈՒ Մի-24 ուղղաթիռը: Երեք օդաչուները զոհվել էին: Հակառակորդն առայսօր կրակի տակ է պահում տարածքը՝ թույլ չտալով մոտենալ զոհերի մարմիններին: