Նոյեմբերի 18-ին էկոնոմիկայի նախարար Կարեն Ճշմարիտյանն ընդունել է Հայաստանում Կանադայի արտակարգ եւ լիազոր դեսպան Ջոն Ռոնալդ Քյուրին:
Կարեւորելով հայ-կանադական առկա առեւտրատնտեսական հարաբերությունների զարգացումը` Էկոնոմիկայի նախարարը վստահություն է հայտնել, որ համատեղ աշխատանքի շնորհիվ հնարավոր կլինի նպաստել այդ հարաբերությունների խորացմանն ու ընդլայնմանը` մասնավորապես երկու երկրների միջեւ օդային հաղորդակցության, գյուղատնտեսության, մետաղական հանքաքարի արդյունահանման, ներդրումների ոլորտում: Կարեն Ճշմարիտյանը հատկապես կարեւորել է Կանադայի փորձով Հայաստանում նորարարության համակարգի ներդրման հարցը:
Դեսպան Ջոն Ռոնալդ Քյուրը, շնորհակալություն հայտնելով հանդիպման համար, նշել է, որ հայ-կանադական առեւտրատնտեսական հարաբերություններն ավելի ամրապնդելու նպատակով 2015 թվականին նախատեսվում է բարձրաստիճան պատվիրակությունների փոխայցելություններ Հայաստան եւ Կանադա` առեւտրաշրջանառության, ներդրումների, գյուղատնտեսության, նորարարության ոլորտներում փորձի փոխանակման նպատակով:
Հանդիպման վերջում կողմերը պատրաստակամություն են հայտնել աշխատանքային խմբերի մակարդակով քննարկել եւ պաշտոնական ձեւակերպումներ տալ երկկողմ պայմանավորվածությունների վերաբերյալ:
