Հայաստանը շարունակելու է մաքսային համակարգի բարեփոխումները: Այս մասին, այսօր՝ նոյեմբերի 20-ին, Համաշխարհային մաքսային կազմակերպության գլխավոր քարտուղար Կունիո Միկուրիայի հետ հանդիպման ժամանակ նշել է Հայաստանի վարչապետ Հովիկ Աբրահամյանը:
Կառավարության մամուլի ծառայությունից հայտնում են, որ վարչապետն արդյունավետ է գնահատել երկկողմ համագործակցությունը եւ նշել, որ հանդիպումը լավ հնարավորություն է մաքսային ոլորտի բարեփոխումների ընթացքը եւ հետագա անելիքները քննարկելու համար: Հովիկ Աբրահամյանի խոսքով՝ ՀՀ մաքսային ծառայությունում վերջին տարիներին իրականացված բարեփոխումներն արդեն շոշափելի արդյունքներ են տվել. ըստ Համաշխարհային բանկի 2014 թ. «Doing Business» վարկանիշային աղյուսակի՝ Հայաստանը 4 կետով բարելավել է իր դիրքը եւ 49-րդ կետից բարձրացել 45-րդ կետ:
Կունիո Միկուրիան ողջունել է ՀՀ կառավարության քաղաքականությունը հարկային եւ մաքսային վարչարարության բարելավման ուղղությամբ եւ նշել, որ 2009 թ. մեր երկիր կատարած իր առաջին այցից հետո, այս առումով, Հայաստանն էական առաջընթաց է արձանագրել: Պարոն Միկուրիան, մասնավորապես, բարձր է գնահատել մաքսային ընթացակարգերում ժամանակակից բարձր տեխնոլոգիաների ներդրումը, կադրերի վերապատրաստումը, Մաքսային օրենսգրքի կատարելագործումն ու համապատասխանեցումը միջազգային չափանիշներին եւ այլն:
Հանդիպման ընթացքում զրուցակիցներն անդրադարձել են համատեղ ընթացիկ եւ առաջիկա ծրագրերին: Երկուստեք ընդգծվել է, որ մաքսային ծառայությունում տարվող բարեփոխումները պետք է նպաստեն գործարար միջավայրի բարելավմանը եւ երկրի տնտեսության մրցունակության բարձրացմանը: Նշելով, որ ոլորտում դեռ բավական անելիքներ կան, եւ կառավարությունը շարունակելու է մաքսային համակարգի բարեփոխումները, վարչապետը կարեւորել է Համաշխարհային մաքսային կազմակերպության հետ համագործակցության ամրապնդումը եւ խորացումը:
