Ռուսաստանում քննարկվում է Արկտիկայի զարգացման հարցերով նախարարություն ստեղծելու հարցը: Նման գերատեսչություն արդեն ստեղծվել է Հեռավոր Արեւելքի համար: Այս մասին հայտնում է «Մոսկովսկի Կոմսոմոլեցը»՝ վկայակոչելով Յամալո-Նենեցկի ինքնավար շրջանի օրենսդիր ժողովի աղբյուրը:
Գերատեսչությունը կարող է գլխավորել շրջանի ներկայիս ղեկավար Դմիտրի Կոբիլկինը, որի լիազորությունների ժամկետը լրանում է 2015թ.:
Նոր գերատեսչության ստեղծման մասին տեղեկությունը հաստատել է նախագահի աշխատակազմի աղբյուրը: Ըստ նրա՝ արկտիկական տարածքների զարգացման նախարարության ստեղծումը վաղուց էր նախատեսվում, քանի որ Արկտիկան երկրի համար կարեւոր ռազմավարական շրջան է:
Ըստ աղբյուրի՝ այժմ կազմվում է այդ պաշտոնի հավանական թեկնածուների ցանկը: Միաժամանակ, վարչապետի մամուլի քարտուղար Նատալյա Տիմակովան հայտնել է, որ կառավարության կազմում փոփոխություններ չեն նախատեսվում: