«Հովիկ Աբրահամյանը եկել հանդիպել է մի ծակ գրպանի, որից ամեն ինչ արդեն թալանել, կերել, զխտկվել են տզրուկները»: Այս մասին այսօր՝ նոյեմբերի 20-ին, լրագրողների հետ զրույցում ասաց Ազգային անվտանգության նախկին փոխնախարար Գուրգեն Եղիազարյանը՝ խոսելով Հայաստանի արտաքին պարտքի մասին:
ԱԱ նախկին փոխնախարարը նշեց, որ «տզրուկները» 6 տարվա ընթացքում երկրի արտաքին պարտքը ավելացրել են 3.5 միլիարդով:
«Մեր արտաքին պարտքը արդեն թեւակոխում է 4.5 միլիարդը, եթե դուք հիշում եք՝ Առաջ Հայասատանի եւ Ապահով Հայաստանի արանքում ընկած ժամանակահատվածում մենք ունեին մոտավորապես մեկ միլիարդ երկու հարյուր միլիոն արտաքին պարտք: 4.5 միլիարդը բարձել են մեր սերունդների վրա, եւ էլի պետք ա բարձեն: Հիմա, որ ասեմ, կասեն՝ եկել ա Հովիկ Աբրահամյանի պաշտպանելու: Հովիկ Աբրահամյանը եկել ա՝ մի հատ ծակ գրպանի է հանդիպել, որից ամեն ինչ թալանել, կերել զխտկվել են տզրուկները»,- նշեց Գուրգեն Եղիազարյանը։
Գուրգեն Եղիազարյանը երկրում առկա խնդիրների համար մեղավոր է համարում միայն նախագահ Սերժ Սարգսյանին:
NEWS.am-ի հարցին, թե ու՞մ է տեսնում Հայաստանի նախագահի պաշտոնում, գուցե Հովիկ Աբրահամյանի՞ն, նախկին փոխնախարարը պատասխանեց.
«Ինչո՞ւ ոչ։ Ես բացի Հովիկ Աբրահամյանից տեսնում եմ ցանկացած մարդու, ով մտածում է երկրի մասին, եւ երբ գիշերը գլուխը դնում է բարձին, աչքի առաջ կանգնում են 82 հազար սոված մարդիկ: Ցանկացածին, ով հանգիստ նանիկ չի անում գիշերը չաղ ու բախտավոր»: