ԱՄՆ Գաղտնի ծառայության աշխատակիցները Սպիտակ տան մոտ Միչիգան նահանգից մի երիտասարդ կնոջ են ձերբակալել, որի մոտ ատրճանակ է եղել: Այս մասին լրագրողներին հայտնել է Էդ Դոնովանը՝ գաղտնի ծառայության հատուկ ներկայացուցիչը, որն զբաղվում է պետության առաջին դեմքերի եւ օտարերկրացի բարձրաստիճան հյուրերի անվտանգության ապահովմամբ, փոխանցում է ՏԱՍՍ-ը:
Ըստ նրա՝ ձերբակալվել է 23-ամյա Էյփրիլ Լենարթը: Նրա մոտ եղել է 9 մմ տրամաչափի ատրճանակ: Լենարթին ինչ-որ մարդ էր ուղեկցելիս եղել, որի անունը չի նշվում: Նրան չեն ձերբակալել:
Դոնովանը նշել է, որ Լենարթը հրաժարվում է պատասխանել քննիչների հարցերին, այդ պատճառով էլ նրա դրդապատճառներն առայժմ հայտնի չեն: Նրան ձերբակալել են անմիջապես այն բանից հետո, երբ նախագահ Բարաք Օբաման ավարտել է Սպիտակ տնից համաքաղաքացիներին ուղղված հեռուստաուղերձը՝ նվիրված ԱՄՆ ապօրինի ներգաղթի խնդիրների լուծման անհրաժեշտությանը: