ԲՀԿ խոսնակ Տիգրան Ուրիխանյանը մեկնաբանել է «Ժառանգության» նախագահ Րաֆֆի Հովհաննիսյանի հայտարարությունը:
Նա մասնավորապես, ասվել է.
«Մենք հարգանքով ենք վերաբերվում մեր քաղաքական գործընկերոջ տեսակետներին եւ բարձրացրած հարցերին:
Մենք վերահաստատում ենք մեր տեսակետը, որ քաղաքական ուժերից յուրաքանչյուրի իրավունքն է ինքնուրույն կազմակերպել ցանկացած զանգվածային եւ հրապարակային միջոցառում:
Մենք ցանկանում ենք մեկ անգամ եւս ընդգծել, որ Բարգավաճ Հայաստան կուսակցությունը լիարժեք տիրապետում է երկրում առկա աննախադեպ դժգոհությունների ողջ ծավալին: Մենք առաջ ենք շարժվում սառը հաշվարկված, գրագետ քայլերի ճանապարհային քարտեզով, որպես հիմնական նպատակ ունենալով երկրում արմատական եւ անշրջելի փոփոխությունների իրականացումը, ժողովրդի բարեկեցության բարձրացումը եւ Հայաստանի Հանրապետության ուժեղացումը:
Ամբողջ երկրով մեկ բացվող համաժողովրդական շարժման գրասենյակները նպատակ ունեն հզորացնելու շարժման ռեսուրսները, մոբիլիզացնելու ողջ ժողովրդին, նորանոր սոցիալական խավեր եւ հասարակական շերտեր ներգրավելու համաժողովդրական պայքարին: Շարժմանը միացող կուսակցությունների, հասարակական կազմակերպությունների, քաղաքացիական նախաձեռնությունների աննախադեպ ծավալը վկայում է, որ փոփոխությունների գաղափարը օր օրի լայնորեն տարածվում է Հայաստանում եւ սփյուռքում: Որեւէ շարժում չի հասել հաջողության առանց լուրջ կազմակերպչական աշխատանքի:
Մենք կարեւորում ենք նաեւ հզոր զանգավածային միջոցառումները, որոնք անպայման լինելու են եւ որտեղ ժողովրդի ձայնը կհնչի շատ ավելի հզոր, քան երբեւէ:
Համաժողովդրական շարժումն իր բոլոր նպատակներին հասնելու է խաղաղ եւ անցնցում ճանապարհով: Եվ մեր հաղթանակը որեւէ մեկի մոտ կասկած չի կարող հարուցել»:
Ավելի վաղ Րաֆֆի Հովհաննիսյանը հայտարարել էր. «Մենք պետք է տղամարդկություն ունենանք խոստովանելու, որ խորհրդարանական ուժերի եռյակի շրջանում կան հարցեր, որոնք բաց են՝ հրապարակային գործունեության շարունակման խնդիրը, շարժման սկզբունքները, որոշումներ կայացնելու անհրաժեշտությունը»: Նրա խոսքով՝ վերջնական համձայնություն չկա ոչ շարժման հռչակման, ոչ հետագա հրապարակային գործունեության առումով: Բացի այդ, «Ժառանգության» առաջնորդը հայտարարել է, որ իրենք առանձին հանրահավաքների ու հանդիպումներ շարք են անցկացնելու տարբեր մարզերում:
