Ազգային ժողովի ՀՀԿ խմբակցության պատգամավոր Սուքիաս Ավետիսյանը կարծում է, որ խորհրդարանում ԵՏՄ-ին անդամակցելուն կողմ է քվեարկելու միայն իրենց խմբակցությունը:
«Եթե վերջին մեկ տարվա քաղաքական դեգերումները` եռյակ, քառյակ, հնգյակ, չլինեին, ապա շատերը կողմ կքվեարկեին: Սակայն այժմ կարծում եմ, որ միայն ՀՀԿ-ն կմասնակցի քվեարկությանը»,- այս մասին այսօր` նոյեմբերի 24-ին, լրագրողների հետ զրույցում ասաց ՀՀԿ-ական պատգամավորը:
Լրագրողների դիտարկմանը, թե եռյակն իր հանրահավաքների ժամանակ ջերմեռանդորեն է խոսում ԵՏՄ-ի մասին, Սուքիաս Ավետիսյանը հակադարձեց. «Քիչ եմ հավատում նրանց խոսքերին, երբ 2013թ.-ի սեպտեմբերի 3-ին Սերժ Սարգսյանը հայտարարեց Մաքսային միությանն անդամակցելու մասին, նույն Լեւոն Տեր-Պետրոսյանը դեմ էր խոսում դրան: Այնպես որ հիմա էլ կարող է նրանց դիրքորոշումները փոխվեն»:
Նշենք, որ նախատեսվում է` հունվարի մեկից Հայաստանը կանդամակցի Եվրասիական տնտեսական միությանը:
