«Բարգավաճ Հայաստան»-ը չի քննարկում Վայոց ձորի մարզպետի պաշտոնում առաջադրված թեկնածուին փոխելու հարցը։ Այս մասին NEWS.am-ի թղթակցի հետ զրույցում քիչ առաջ ասաց ԲՀԿ առաջնորդ Գագիկ Ծառուկյանի մամուլի խոսնակ Խաչիկ Գալստյանը՝ հավելելով. «Մենք առաջարկել ենք մեր թեկնածուին: Մենք թեկնածուի փոփոխման հարցը չենք քննարկել, եւ կարծում եմ կառավարությունը մոտ ժամանակներս մեր թեկնածուին կնշանակի»:
Նշենք, որ կոալիցիոն քվոտայով Վայոց ձորի մարզպետի պաշտոնը ԲՀԿ-ինն է, որն այդ պաշտոնում առաջադրել է Սերգեյ Բագրատյանին։ Սակայն կառավարությունն արդեն երկրորդ նիստն է՝ իր օրակարգում այդպես էլ չի ընդգրկում Վայոց ձորի մարզպետի նշանակման հարցը, ուստի, այդ հարցը առնվազն եւս մեկ շաբաթով հետաձգվեց: Նկատենք, որ Բագրատյանին չնշանակելու պատճառն, ըստ շրջանառվող լուրերի այն է, որ Բագրատյանի թեկնածությունը չի արժանացել կառավարության ղեկավարի հավանությանը, եւ վերջինս առաջարկել է այլ թեկնածուի առաջադրել։ Խաչիկ Գալստյանն ասաց, թե չի կարող հաստատել այդ տեղեկատվությունը եւ պնդեց. «Որեւիցե տեղից մեր թեկնածուին փոխելու առաջարկ չի եկել։ Այնպես որ, մեր թեկնածուն մնում է անփոփոխ»:
Նկատենք, որ Սերգեյ Բագրատյանը 2007 թվականին թիվ 39 ընտրատարածքից մեծամասնական ընտրակարգով մասնակցել է պատգամավորական ընտրություններին, սակայն պարտվել է ՀՀԿ թեկնածու Սամվել Սարգսյանին։ Վայոց ձորի մարզպետի թեկնածուն գործարար է եւ ղեկավարում է հեղուկ վառելիքի եւ սննդի առեւտրով զբաղվող «Սերգեյ Գրուպ» ընկերությունը։
Հիշեցնենք, որ Վայոց ձորի նախկին մարզպետ Վարդգես Մաթեւոսյանը մահացել է հունիսի 12-ին:
