ԱՄՆ պետքարտուղար Հիլլարի Քլինթոնը Հարավային Կովկաս կատարած իր այցի ընթացքում կկատարի նախագահ Բարաք Օբամայի հանձնարարությունը տարածաշրջանի յուրաքանչյուր պետության համար առանձին-առանձին։ Հայաստանի եւ Ադրբեջանի դեպքում այդ հանձնարարությունը կվերաբերվի ղարաբաղյան հարցին։ NEWS.am-ի թղթակցի հետ զրույցում նման կարծիք է հայտնել ռուս փորձագետ Անատոլի Ցիգանոկը։
Նրա խոսքով, Ռուսաստանի եւ ԱՄՆ-ի շահերը ղարաբաղյան հակամարտության գործում համընկնում են, երկու գերտերությունները ցանկանում են, որ խնդիրը լուծվի ամենակարճ ժամանակահատվածում, եւ այս համատեքստում Քլինթոնը կփորձի մղել կողմերին դեպի մադրիդյան սկզբունքներ։ Անշուշտ դա մի քիչ դժվար կլինի, քանի որ ո՛չ հայկական եւ ո՛չ էլ ադրբեջանական կողմը ամբողջությամբ չեն ընդունում այդ սկզբունքները»,-ասաց փորձագետը։ Ընդ որում նա նշեց, որ Մոսկվայի եւ Վաշինգտոնի միջեւ մրցակցությունը չի լինի տարածաշրջանում ազդեցությունը ուժեղացնելու համար, քանի որ Վրաստանի եւ Ռուսաստանի միջեւ 5-օրյա պատերազմից հետո իրավիճակը Հարավային Կովկասում փոխվել է։
Փորձագետի կարծիքով, քիչ հավանական է, որ ամերիկյան ուժեր կտեղակայվեն Ադրբեջանում՝ Իրանին հետեւելու համար։ «Այսօր ԱՄՆ դժվար թե գնա այդ քայլին, քանի որ Վաշինգտոնի համար հիմա առաջնայինը Իրաքից եւ Աֆղանստանից արժանապատվորեն դուրս գալն է։ Աֆղանստանի դեպքում ԱՄՆ-ին դա դժվար թե հաջողվի»,-հայտարարել է նա։
Ցիգանոկը նաեւ ասել է, որ Քլինթոնը տարածաշրջան իր այցելության ընթացքում կփորձի Հայաստանին աջակցել Թուրքիային ճնշելու համար, քանի որ վերջին շրջանում թուլացել են Անկարայի վրա ազդելու Վաշինգտոնի լծակները։
«Ես չեմ բացառում, որ Քլինթոնը կփորձի ճնշում գործադրել Թուրքիայի վրա հայ-թուրքական սահմանը բացելու վերաբերյալ»,-ասել է փորձագետը։ Միեւնույն ժամանակ նա չի բացառել, որ հավանական է՝ ԱՄՆ պետքարտուղարը մյուս կողմից էլ ճնշում գործադրի Հայաստանի վրա՝ Իրանի հետ համագործակցության հարցում։ «Հնարավոր է, որ Վաշինգտոնը կպահանջի Երեւանից «դադարեցնել» իր հարաբերությունները Թեհրանի հետ»,-ամփոփեց փորձագետը։
Նշենք, որ ԱՄՆ պետքարտուղարն արդեն տարածաշրջանում է։ Հայաստանում նա կլինի հուլիսի 4-5-ը։