Այս տարին աչքի է ընկել արտակարգ դեպքերի առատությամբ: Այդ մասին այսօր՝ լրագրողների հետ հանդիպմանն ասել է ԱԻՆ ճգնաժամային կառավարման կենտրոնի պետ, փրկարար ծառայության գնդապետ Հովհաննես Խանգելդյանը՝ ներկայացնելով 2014 թ. առաջին 9 ամիսների ընթացքում հանրապետության տարածքում գրանցված արտակարգ պատահարների վիճակագրությունը:
«9 ամսվա ընթացքում ԱԻՆ ճգնաժամային կառավարման կենտրոնում արձանագրվել է 9525 դեպք, որոնց հետեւանքով զոհվել է 445 եւ տուժել 6702 մարդ: Դեպքերի մեծ մասը տեխնածին են: Անցյալ տարվա նույն ժամանակահատվածում գրանցվել էր 8507 դեպք, 466 զոհ եւ 6619 վիրավոր: Փրկարարների շնորհիվ այս տարի փրկվել է 133 մարդու կյանք»,- նշել է գնդապետը:
Նրա խոսքով, պատահարների գերակշիռ մասը տեղի է ունեցել մայրաքաղաքում: Նա նաեւ նշել է, թե տարին աննախադեպ էր ուժեղ քամիների քանակով ու պատճառած վնասով: ԱԻՆ «911» ծառայությունը ծանրաբեռնված աշխատել է` օրական պատասխանելով 2-6 հազար զանգի: 9 ամսվա ընթացքում ՃԿԿ օպերատիվ հեռախոսահամարներին ստացվել է 1 117 300 զանգ, որոնց թիվը 2012-2013 թթ. նույն ժամանակահատվածի համեմատությամբ աճել է համապատասխանաբար` 139 991 (14.3 %) եւ 76 906 (7.4 %) զանգով: