Արցախի նախագահ Բակո Սահակյանի այցը Ֆրեզնո ընդգծում է, թե որքան բարձր են գնահատում տեղի հայ համայնքին Հայաստանում եւ Լեռնային Ղարաբաղում: Ըստ «The Fresno Bee»-ի, այս մասին հայտարարել է Ֆրեզնոյի շրջանի դիտարկման խորհրդի նախագահ Անդրեաս Բորջասը՝ մեկնաբանելով կալիֆորնիական այդ քաղաք Արցախի Հանրապետության նախագահ Բակո Սահակյանի այցը:
«Անկախ Լեռնային Ղարաբաղի ստեղծմանն ուղղված ջանքերը պարզապես ինչ-որ տեղ հեռվում տեղի ունեցող հակամարտություն չէին: Իրականում դա առնչվել է այստեղի բազմաթիվ մարդկանց»,- նշել է Անդրեաս Բորջեսը՝ հիշատակելով, մասնավորապես, ծնունդով Վիսեյլի քաղաքից Մոնթե Մելքոնյանին:
Կալիֆորնիական թերթը նշում է, որ Սան Խոակին կատարած առաջին այցի ընթացքում Բակո Սահակյանն ընդունելության ժամանակ հանդիպել է Ֆրեզնոյում Հայաստանի պատվո հյուպատոս Պերճ Աբգարյանի, Լոս Անջելեսում Հայաստանի գլխավոր հյուպատոս Սերգեյ Սարկիսովի, ինչպես նաեւ ԱՄՆ Կոնգրեսի Ներկայացուցիչների պալատի անդամ Ջիմ Կոստայի եւ սենատոր Էնդի Վիդակի հետ:
Ավելի ուշ նա Ֆրեզնոյի կենտրոնում 250 տեղի հայերի հետ մասնակցել է ընթրիքի: Բակո Սահակյանն ասել է. «Մենք, անկասկած, ավելի ուշ կվերադառնանք այս իրադարձությանը, եւ ես արդեն կարծում եմ, որ այն մեր հետագա համագործակցության հիմք է ստեղծել»:
