Մեկնաբանելով Մոսկվայի եւ Սուխումի միջեւ համատեղ զորքեր ստեղծելու մասին համաձայնագրի կնքումը՝ Լատվիայի արտգործնախարար Էդգարս Ռինկեւիչսը հայտարարել է, որ Ուկրաինայի դեպքերը տեղափոխվում են Կովկաս, փոխանցում է «Էխո Կավկազա»-ն:
«Լատվիան մշտապես աջակցել է Վրաստանի տարածքային ամբողջականությանը, եւ մենք արդեն դատապարտել ենք պայմանագրի ձեւակերպումը, որը խախտում է դրա տարածքային ամբողջականությունն ու միջազգային իրավունքը: Մենք արդեն տեսնում ենք, որ Ուկրաինայի դեպքերը տեղափոխվում են Կովկաս: Միջազգային հանրությունը պետք է պատրաստ լինի այդ մարտահրավերներին», - կարծում է Ռինկեւիչսը:
Պատասխանելով լատվիական պատվիրակության Վրաստան այցի նպատակի մասին հարցին՝ նախարարը նշել է, որ առաջին հերթին նպատակը Վրաստանի եվրաատլանտյան ձգտումներին աջակցելն էր:
«Մենք՝ որպես Եվրամիության ապագա նախագահող երկիր, պատրաստ ենք աշխատել Վրաստանի կառավարության հետ Ռիգայի գագաթաժողովի համար եւ հույս ունենք, որ կարող ենք ավարտին հասցնել վիզաների ազատականացման ծրագիրը», - ասել է արտգործնախարարը: