ԵՄ-ն պատրաստ է ԵՏՄ-ի հետ առեւտրային հարցեր քննարկել, հայտարարել է Գերմանիայի կանցլեր Անգելա Մերկելը, փոխանցում է «ՌԻԱ Նովոստին»:
«Մենք պատրաստ ենք քննարկել ԵՄ-ի եւ ԵՏՄ-ի միջեւ առեւտրային հարցեր», - Մերկելի խոսքերն է մեջբերում գործակալությունը:
Աղբյուրը հիշեցնում է, որ հոկտեմբերի վերջին, ելույթ ունենալով Վալդայի միջազգային բանավիճային ակումբի նիստում, ՌԴ նախագահ Վլադիմիր Պուտինը հայտարարել էր, որ Ռուսաստանը կողջուներ ԵՄ-ի եւ ԵՏՄ-ի մասին բովանդակային երկխոսությունը: Նա նշել էր, որ Մոսկվային այդ հարցում մինչ այժմ մշտապես մերժել են, եւ հասկանալի չէ, թե ինչու: Պուտինը նաեւ ասել էր, որ նման համատեղ աշխատանքի դեպքում խոսք կարող է գնալ Ատլանտյանից մինչեւ Խաղաղ օվկիանոս ձգվող միասնական տնտեսական տիրույթի, հումանիտար համագործակցության ձեւավորման անհրաժեշտության մասին:
Ռուսաստանը, Բելառուսը եւ Ղազախստանը մայիսին ստորագրել եւ արդեն վավերացրել են 2015 թ. հունվարի 1-ից ԵՏՄ-ի ստեղծման մասին պայմանագիրը, հոկտեմբերի 10-ին Մինսկում ստորագրվել է ԵՏՄ-ին Հայաստանի միանալու մասին պայմանագիրը: