Ղարաբաղյան հակամարտության հարցում ակադեմիական շրջանակներն ավելի հաճախ են գնվում, իսկ Ադրբեջանն ագրեսիվորեն ֆինանսավորում է հակահայկական քննարկումները՝ քողարկված «գիտական աշխատանքների» եւ «անաչառ հետազոտությունների» անվան ներքո: Նման «ներդրումների» վերջին պտուղը դարձել է նոյեմբերի 26-ին Մեծ Բրիտանիայի Բիրմինգեմի համալսարանի համաժողովը: Այս մասին գրում է Ամերիկայի հայկական «Asbarez» պարբերականը:
Աղբյուրի համաձայն, կլոր սեղանի շուրջ քննարկման են հրավիրվել Մինսկի խմբի նախկին համանախագահը, ինչպես նաեւ մի քանի գիտնականներ՝ որպես զեկուցող: Միջոցառման թեման եղել է «Ղարաբաղյան հակամարտությունը. պատմության օգտագործումն ու սխալ օգտագործումը»:
Չնայած համալսարանական մթնոլորտն ու գիտնականների ներկայությունը քննարկմանը որոշակի լեգիտիմություն է հաղորդում, միջոցառման հաղորդագրության մեջ չի բացահայտվում փաստը, որ գիտնականներից երկուսը՝ նախագահող, դոկտոր Գալինա Եմելյանովան եւ զեկուցող, դոկտոր Քամալա Իմրանլի-Լոուն ներկայում աշխատում են մի նախագծի ուղղությամբ, որը ֆինանսավորվում է ադրբեջանական պետական հաստատություն հանդիսացող Ադրբեջանի ոչ կառավարական կազմակերպությունների պետական աջակցության Խորհրդի կողմից:
Հանրությանը հասանելի համալսարանի տեղեկատվության համաձայն, 2013 թվականի օգոստոսին դոկտոր Ելեմյանովան Ադրբեջանի ոչ կառավարական կազմակերպությունների խորհրդին առաջարկել է ղարաբաղյան հակամարտության մասին արեւմտյան պատկերացումների թեմայով հետազոտություն անցկացնել: Առաջարկն ընդունվել է: Դոկտոր Քամալա Իմրանլի-Լոուն այդ նախագծում գիտաշխատող է: Բացի այդ, դատելով վերջինի հետազոտություններից, նա ակնհայտ հակահայկական տրամադրվածություն ունի: Հաշվի առնելով այս փաստերը, հարկ է հատկապես նշել, որ ոչ մի հայ գիտնական այդ միջոցառմանը ելույթ չի ունեցել:
