Լոս Անջելեսում ոստիկանությունը 200-ից ավելի ցուցարարների է կալանավորել, որոնք համաձայն չէին սեւամորթ դեռահաս Մայքլ Բրաունին սպանած սպիտակամորթ ոստիկան Դարեն Ուիլսոնին դատական պատասխանատվությունից ազատելու որոշման հետ:
Տեղի ժամանակով 19:30 –ին Լոս Անջելեսի ոստիկանությունը ցուցարարներին կարգադրել է ցրվել 4 րոպեի ընթացքում: Չհնազանդվողներին իրավապահները ավտոբուսներով տարել են բաժին: Նրանց 500 դոլար գրավի դիմաց կարող են ազատել: Իսկ նրանք, որոնց համար գրավ չեն վճարի, բանտում կմնան մինչեւ դեկտեմբերի 1-ը:
Լոս Անջելեսում բողոքի ցույցերը շարունակվում են արդեն երրորդ օրը: Մի քանի հարյուր մարդ փողոց են դուրս եկել: Ցուցարարները պահանջում են դատել Ուիլսոնին, ինչպես եւ ԱՄՆ-ում անզեն մարդկանց սպանած այլ սպաների: Ակտիվիստները գոչում են. «Չլինի դատ, չի լինի խաղաղություն», «Ազատեք ցուցարարներին, բանտարկեք մարդասպաններին», «Պահանջում ենք արդարադատության կիրառում մարդասպան ոստիկանների հանդեպ» եւ այլ կարգախոսներ: