Եվրասիական տնտեսական միությանը անդամակցելուց հետո Հայաստանը կանգնելու է լուրջ սոցիալական խնդիրների առաջ, ունենալու ենք գնաճ: Այս մասին այսօր՝ նոյեմբերի 27-ին, լրագրողների հետ հանդիպմանն ասաց «Ժառանգության» պատգամավոր Ալեքսանդր Արզումանյանը:
Նա նշեց, որ այդ հանգամանքը կապ չունի ռուբլու փոխարժեքի տատանման հետ, սոցիալակն խանդիրները եւ սպասվելիք գնաճը կապված են ԵՏՄ-ի հետ:
Պատգամավորը նկատեց, որ ցավալիորեն թե հայաստանյան իշխանությունը, թե իշխանությունից դուրս գործող խորհրդարանական ուժերը հայտարարել են, որ կողմնակից են ԵՏՄ-ին: Նրա խոսքով՝Հայաստանում ընդունված է մտածել, թե ՌԴ-ն է որոշում Հայաստանի իշխանությունների ձեւաչափը, փոփոխությունները, եւ իշխանության ձգտող ուժերը փորձում են սիրաշահել Ռուսաստանին եւ խուսափում են հայտարարություններից, որոնք կարող են զայրացնել ՌԴ-ին: «Ենթադրվում էր քննարկումները անցկացնել հնարավորինս լայն սպեկտրով, բայց ինչպես տեսաք, ոչ ՀԱԿ-ը, ոչ ԲՀԿ-ն մասնակցություն չունեցան, միակողմանի քննարկում եղավ»,-ասաց նա: Պատգամավորը պատրաստվում է ԱԺ քառօրյայի ժամանակ եւս մատնանշել ԵՏմ անդամակցության վտանգները: Նրա փոխանցմամբ՝ Հայաստանի անդամակցության պայմանագիրը քննարկելու համար գլխադասային է նշանակվել ԱԺ տնտեսական հարցերի հանձնաժողովը, ինչը թյուրիմացության մեջ է գցում հանրությանը, քանի որ, իր փոխանցմամբ, սա քաղաքական պրոյեկտ է:
Ալեքսանդր Արզումյանի խոսքով՝ բացարձակապես չի խոսվում այն մասին, թե ուր ենք գնում, ինչ է սպասվում, դեռ չկայացած ԵՏՄ-ն փլուզման նշաններ է ցուցաբերում: Ինչ վերաբերում է Հայաստանի ԵՏՄ անդամակցությանը անշրջելի որակելուն, պատգամավորը նկատեց, որ նախ՝ անշրջելի ոչինչ չկա, եւ հետո չկա մի պայմանագիր, որին պետք է միանաս ու այլեւս չես կարող դուրս գալ, այս պարագայում պետք չի մտնել, նոր հետո դուրս գալ:
