ՀՀ ԱԺ պատգամավոր Էդմոն Մարուքյանը, նոյեմբերի 26-ին, գրությամբ դիմել է ՀՀ Վերահսկիչ պալատի նախագահ Իշխան Զաքարյանին ու առաջարկել Վերահսկիչ պալատի 2015 թվականի տարեկան ծրագրում որպես առանձին թեմա (ծրագրային հարց) ներառել եւ մանրամասն քննության առարկա դարձնել նաեւ «Հարավկովկասյան երկաթուղի» ՓԲԸ կրած վնասների իրական չափերը:
Այս առնչությամբ Էդմոն Մարուքյանի տարածած հաղորդագրության մեջ նշվում է.
«Առաջարկությունը հիմնավորվում է նրանով, որ, ինչպես հայտնի է, Հայաստանի Հանրապետությունը յուրաքանչյուր տարի պետական բյուջեից սուբսիդավորում է «Հարավկովկասյան երկաթուղի» ՓԲԸ կրած վնասները: Մասնավորապես, ըստ տարիների՝ սուբսիդիաների գումարն ունի հետեւյալ տեսքը՝
2011 - 167 մլն ՀՀ դրամ
2012 - 155 մլն ՀՀ դրամ
2013 - 328 մլն ՀՀ դրամ
2014 - 536,5 մլն ՀՀ դրամ
2015 - 496,5 մլն ՀՀ դրամ
Այսինքն, 2011-2014 թվականների ընթացքում այդ վնասը կտրուկ աճել է եւ եռապատկվելով հասել ու գերազանցել 0,5 մլրդ ՀՀ դրամը, ինչն առնվազն կասկածի տեղիք է տալիս:
Հիշեցնենք, որ ՀՀ Վերահսկիչ պալատի 2015 թվականի տարեկան ծրագրի նախագիծն այժմ գտնվում է խորհրդարանում եւ շուտով կքննարկվի պլենար նիստերի ընթացքում»: