Ավստրալիայի Բրիսբեն քաղաքում վերջին 30 տարվա ամենասաստիկ փոթորիկն է սկսվել: Տուժել է 39 մարդ, փոխանցում է Lenta.ru-ն՝ վկայակոչելով տեղի մամուլը:
Ըստ աղբյուրի՝ քաղաքում բազմաթիվ ծառեր եւ էլեկտրահաղորդման լարեր են տապալվել: Քաղաքի շուրջ 90 հազար տուն մնացել է առանց լույսի: Փոթորիկը պոկել է տների տանիքները, կոտրել բարձրահարկ շենքերի պատուհանները, ինչպես նաեւ շրջել չորս թեթեւ մարդատար օդանավ՝ Բրիսբենի օդանավակայաններից մեկում:
Փոթորիկն ուղեկցվել է թենիսի գնդակի չափ կարկուտով, որի պատճառով ստիպված են եղել ընդհատել տեղի խորհրդարանի աշխատանքը: Ըստ АВС News-ի՝ վնասվել է համաժողովների սրահը, որտեղ երկու շաբաթ առաջ հանդիպել էին «Մեծ քսանի» առաջնորդները:
Կես ժամվա ընթացքում տեղացել է ամսական տեղումների նորման, փողոցներում մեքենաներն ամբողջությամբ ջրի տակ են: Փողոցները մաքրելուն մասնակցում են ոչ միայն քաղաքային ծառայությունների աշխատակիցները, այլեւ շուրջ 100 զինծառայողներ:
