Անհայտ անձի կողմից ակտիվիստ Գեւորգ Սաֆարյանի վրա հարձակվելու դեպքի առթիվ ոստիկանության կենտրոնականի բաժնում կատարվում է հետաքննություն: Այս մասին NEWS.am-ի թղթակցի հետ զրույցում հայտնեցին ոստիկանության լրատվական ծառայությունից:
Նրանց փոխանցմամբ՝ դեպքի առթիվ նշանակված է դատաբժշկական փորձաքննություն, որի պատասխանը ստանալուց պարզ կլինի քննություն ընթացքը:
Իսկ «Նախախորհրդարանի» անդամ, կինոռեժիսոր Տիգրան Խզմալյանը NEWS.am-ի թղթակցի հետ զրույցում ասաց, որ սա միանշանակ մահափորձ է, երբ մարդու գլխին հարվածում են ծանր երկաթով: Նա չգիտի՝ տարածքում տեսախցիկներ կան, թե ոչ, բայց նույնիսկ դրանց առկայությունը եւ տեսագրությունները ոչինչ չեն փոխելու քննության ընթացքում, «հանցակիցների հետ որեւէ հույս կապելը տարօրինակ է, մենք հույսեր ենք կապում ժողովրդի ապստամբության հետ»:
Հիշեցնենք, որ «Նախախորհրդարանի» անդամ Գեւորգ Սաֆարյանը, որի վրա նոյեմբերի 27-ի երեկոյան հարձակում էին կատարել, արդեն լավ է, այսօր դուրս է գրվել Երեւանի «Սուրբ Գրիգոր Լուսավորիչ» բժշկական կենտրոնից: Գեւորգ Սաֆարյանը NEWS.am-ին պատմել է, որ իր վրա հարձակվել են, երբ ինքը կանգնած է եղել Խանջյան փողոցի կանգառներից մեկում:
«Նախախորհրդարանից դուրս եկա, հասա մինչեւ Խանջյանի կանգառ, որտեղ երեւի արդեն հետեւում էին ինձ: Կանգառում հարձակվեցին, հետեւիցս ինչ-որ բութ գործիքով խփեցին, ես ուշագնաց եղա, շարունակեցին խփել: Հետո ես, չգիտեմ ոնց, վերադարձել եմ Նախախորհրդարան, այնտեղ ջուր լցրին երեսիս, սթափվեցի, դրանից հետո «Շտապօգնության» մեքենայով բերեցին հիվանդանոց»,-պատմել է Գեւորգ Սաֆարյանը՝ նշելով, որ հարվածից պատռվել է գլուխը, հիվանդանոցում մի քանի կար են տվել:
Հիշեցնենք, որ նոյեմբերի 26-ի գիշերը անհայտ մարդիկ վնասել էին «Նախախորհրդարանի» անդամներից եւ աջակիցներից 7-ի ավտոմեքենաները: