Քաջարան քաղաքի Բարիկավան թաղամասի թիվ 2 շենքի 1-ին հարկի բնակարաններից մեկում բռնկված հրդեհի հետեւաքով տարեց կինը մահացել է: Այս մասին NEWS.am-ի թղթակցի հետ զրույցում ասաց Քաջարանի քաղաքապետ Վարդան Գեւորգյանը:
Նա նշեց, որ տարեց ամուսինները փախստական են եղել: Իսկ թե ինչպես է բռնկվել հրդեհը, քաղաքապետը նշեց հետեւյալը. «Պլիտան միացրել են, նստել կողքը, շալը գցել իրենց վրա ու հեռուստացույց էին նայում, այդպես վառվել է, կրակը դուրս է եկել պատուհանով, տունն էլ է այրվել, ամուսինները եղել են անգիտակից վիճակում, այրված»,-ասաց Վարդան Գեւորգյանը:
Ավելի վաղ հայտնել էինք, որ Փրկարար ծառայությունը նոյեմբերի 27-ին, ժամը 22.35-ին ահազանգ է ստացել, որ հրդեհ է բռնկվել Քաջարան քաղաքի Բարիկավան թաղամասի թիվ 2 շենքի 1-ին հարկի բնակարաններից մեկում:
Դեպքի վայր է մեկնել մեկ մարտական հաշվարկ: Պարզվել է, որ հրդեհը բռնկվել է թիվ 2 շենքի Ա. Հ.-ին պատկանող թիվ 1 բնակարանում: Հրդեհը մեկուսացվել է ժամը 23.11-ին, մարվել՝ 23.17-ին: Մասամբ այրվել է եւ ջերմահարվել է բնակարանի գույքը՝ 30 ք.մ: Հրդեհի հետեւանքով տարբեր աստիճանի մարմնական վնասվածքներով Կապանի բժշկական կենտրոն են հոսպիտալացվել են Ա. Զ.ը (1937թ.) եւ Ա. Հ.-ը (1938թ.):