Լոռու մարզի ընդհանուր իրավասության դատարանում շարունակվում է Վանաձորում 2013թ.-ի հոկտեմբերի 12-ին դանակահարության պատճառով մահացած 15-ամյա Դավիթ Հովակիմյանի գործով դատավարությունը:
NEWS.am-ի թղթակցի հետ զրույցում գործով ամբաստանյալ Կարեն Կունգուրցեւի պաշտպան Արայիկ Պապիկյանը հայտնեց, որ այս պահին հարցաքննվում է Դավիթ Հովակիմյանի թիմակիցներից մեկը:
«Վկան պնդում է, որ դեպքի վայրում է եղել, Դավիթի հետ, դատավարության ընթացքում կպարզվի՝ ճիշտ է ասում, թե ոչ: Նրա հարցաքննությունը չի ավարտվել դեռ, այդ պատճառով չեմ ուզում մեկնաբանություն անել: Ընդհանուր առմամբ, գործով վկաները 30-ից ավելի են, նրանք հերթով պետք է հարցաքննվեն»,- ասաց փաստաբանը:
Գործով հաջորդ նիստը նշանակված է դեկտեմբերի 1-ին:
Նշենք, որ ըստ մեղադրական եզրակացության՝ Կարեն Կունգուրցեւը հոկտեմբերի 12-ին ժամը 18:00-ի սահմաններում կենցաղային հողի վրա վիճաբանել է եւ ապօրինաբար կյանքից զրկելու` սպանելու դիտավորությամբ դանակով մեկ անգամ հարվածել է Դավիթ Հովակիմյանի կրծքավանդակի ձախ կեսի շրջանում`վերջինիս պատճառել մարմնական վնասվածքներ, սակայն վերջինիս ընկերների կողմից օգնության հասնելուց հետո Կարենը դիմել է փախուստի: Դեպքից անմիջապես հետո Դ. Հովակիմյանը տեղափոխվել է «Վանաձոր ԲԿ» ՓԲԸ, որտեղ ժամը 21:35-ին մահացել է:
Կարենին մեղադրանք է առաջադրվել Քրեական օրենսգրքի 34-104-րդ հոդվածի 1-ին մասով: Խափանման միջոց է ընտրվել կալանավորումը:
Նշենք, որ Դավիթը Վանաձոր էր մեկնել՝ հանդբոլի Հայաստանի առաջնության եզրափակիչ մրցաշարին մասնակցելու համար: