ԱՄՆ-ը ցանկանում է ցույց տալ, որ չի կորցրել հետաքրքրությունը հետխորհրդային տարածաշրջանի եւ Հարավային Կովկասի նկատմամբ:
NEWS.am-ի թղթակցի հետ զրույցում նման կարծիք է հայտնել Արտաքին քաղաքականության գերմանական խորհրդի Ռուսաստանի եւ ԱՊՀ երկրների ծրագրերի տնօրեն, քաղաքագետ Ալեքսանդր Ռարը:
Նրա խոսքով, եթե Հարավային Կովկասում ԱՄՆ-ի ազդեցությունը փոքր-ինչ նվազել է, դա չի նշանակում, որ նրան այստեղ ոչինչ պետք չէ: «Որոշ ժամանակ առաջ խոսակցություններ էին պտտվում, որ ԱՄՆ-ը տարածաշրջանից գնացել է կռվելու ահաբեկիչների դեմ Իրաքում եւ Աֆղանստանում:
ԱՄՆ պետքարտուղար Հիլարի Քլինթոնի տարածաշրջանային այցը վկայում է, որ դա այդպես չէ»,- նկատել է քաղաքագետը:
Ռարի կարծիքով, ԱՄՆ-ից առանձնահատուկ ակտիվացում պետք չէ ակնկալել: «Ռազմական միջամտություն չի լինի: Վրաստանի ուղղությամբ ՆԱՏՕ-ի ընդլայնումը հետաձգվել է, ԱՄՆ-ը ռազմակայաններ ունի Կենտրոնական Ասիայում, այնտեղ էլ կմնա: Եթե Միացյալ Նահանգների մոտ տնտեսական իմաստով նոր հետաքրքրություններ ծագեն, կարծում եմ, նա կձգտի վերադառնալ տարածաշրջան»,- նկատել է փորձագետը:
Պատասխանելով հարցին, թե ինչպես կարելի է գնահատել Հիլարի Քլինթոնի կողմից Հայոց ցեղասպանության զոհերի Ծիծեռնակաբերդի հուշահամալիր այցելելու փաստը, Ռարն ընդգծել է, թե դա գեղեցիկ խորհրդանշական ժեստ է, որ ցուցադրում է ԱՄՆ-ի որոշակի վերաբերմունքը, սակայն այդ ուղղությամբ լուրջ քայլեր ակնկալել չի կարելի: «ԱՄՆ-ը սեփական էներգետիկ շահերն ունի եւ չի ցանկանում չափից դուրս հեռուն գնալ: ԱՄՆ-ը չի ցանկանում բախվել Ադրբեջանի հետ՝ չկորցնելու համար կասպիական տարածաշրջանում մանեւրելու հնարավորությունը»,- նշել է քաղաքագետը: