Խորհրդարանի պատգամավորները գրեթե միաձայն սատարեցին տեղեկատվական տեխնոլոգիաների ոլորտի աջակցության մասին օրինագիծը: Օրինագիծն ընդունվել է առաջին ընթերցմամբ՝ 115 «կողմ», ոչ մի «դեմ» եւ 2 ձեռնպահ ձայներով:
«Տեղեկատվական տեխնոլոգիաների ոլորտի պետական աջակցության մասին» օրինագիծն ու ուղեկցող փաթեթը նոր ՏՏ ընկերությունների համար ենթադրում է 3 տարի ժամկետով հարկային արտոնություններ:
Արտոնությունների մեջ մտնում են շահութահարկի զրոյական հարկը (20%-անոց դրույքի դեպքում) եւ 10% եկամտային հարկ (ներկայիս 24,4-36% դրույքի պայմաններում): Ընկերությունները կարող են նաեւ տեխնիկական աջակցություն եւ գրանտներ ներգրավել: Այդ արտոնությունները տարածվում են 15-ից ոչ ավելի աշխատակիցներով նոր ընկերությունների վրա՝ առավելագույնը 3 տարի ժակետով: Օրենքի գործողությունը նույնպես ժամանակավոր է: Այն ուժի է մինչեւ 2020թ.:
Ակնկալվում է, որ նախաձեռնությունը կօգնի տարեկան 40-60 ձեռնարկությունների ստեղծմանը: